من شعر العامية : تجـــــارة كــــلام

تجـــــارة كــــلام

شعر / موسى إسماعيل الفقي
وماشي يتاجر  .:.  بدم الشعوب
ويملا الحناجر  .:. وكل الدروب
مجرد كلام
ويُصبغ كلامه  .:.  بلون المحبة

ويظـهِر ألامه  .:.  لأجل الأحبة
يدوبك كلام
وماشي يبيع .:. كلام بالمزادْ


لإبني شفيع .:. وأخويا عماد
كلامك رماد .:. وأصبح مُعاد
وأصبح مزاد .:. مَلِيه الفساد
تجارتك ياصاحبي .:.عليها كساد
تجارتك كلام  .:. وعمر الكلام
ماشبع جواعه .:. ولبس عرايه
وعلا المقام .:. يا تاجر كـــلام
***
وعمر الكلام ما دفىّ عرايا في ليله بتشتِي
وعمر الكلام ما جاب لي دوايا وخفف ألام
وإدَّى الأطبّه .:. فلوس الروشته
وجمع أحبَّه .:. بطونها ملاها
رغيف مش كلام
***
وعمال تنادي .:. وتزرع إشاعه
ف قلب النوادي .:. وجوه الإذاعه
بإنك ترجع .:. حقوق الجواعه
كفايه لكاعه .:. وبطل جنون
وهات لي مناعه .:. تهدي البطون

***
أكلنا كلام .:. فطارنا كـــلام
عشانا كلام .:. هدومنا كلام
كفايه الكلام  .:. كرهنا الكلام
وهات جلابية .:.قماش مش كلام
دا عمر الكلام
ماشبع جواعه .:. ولبس عرايه
وعلا المقام .:. يا تاجر كـــلام
***

0 التعليقات:

إرسال تعليق